Oʻzbekiston Respublikasi Iqtisodiyot va moliya vazirligi huzuridagi
Oʻquv markazida malaka oshirayotgan tinglovchilar uchun darsdan tashqari vaqtda maʻnaviy-maʻrifiy tadbir tashkil etildi.

Tadbir doirasida tinglovchilarga Oʻzbekistondagi Islom sivilizatsiyasi markaziga maʻrifiy sayohat uyushtirildi.

Tashkil etilgan sayohatdan asosiy maqsad tinglovchilarning kasbiy
bilimlarini oshirish, ularning maʻnaviy-maʻrifiy dunyoqarashini kengaytirish,
milliy tariximiz va boy madaniy merosimizga boʻlgan qiziqishini yanada kuchaytirishdan iborat.

Tashrif davomida ishtirokchilar Oʻzbekiston hududida shakllangan boy ilmiy, madaniy va maʻnaviy meros, buyuk ajdodlarimizning jahon sivilizatsiyasi taraqqiyotiga qoʻshgan munosib hissasi haqida maʻlumotlarga ega boʻldilar. Shuningdek, islom sivilizatsiyasining ilm-fan, taʻlim, madaniyat va
sanʻat rivojidagi oʻrni haqida fikr-mulohazalar bildirildi. Markazning ilmiy-maʻrifiy faoliyatida tarixiy manbalar, qoʻlyozmalar, milliy sanʻat va madaniy merosni oʻrganish hamda ularni keng jamoatchilikka yetkazilishiga alohida eʻtibor qaratildi.

Maʻrifiy sayohat ishtirokchilarda tarixiy xotirani asrash, milliy qadriyatlarga hurmat bilan munosabatda boʻlish va ajdodlar merosini chuqur oʻrganishga
boʻlgan qiziqishni yanada oshirdi.