Moliya vazirligi huzuridagi O‘quv markazida Hindistonning “C&K” kompaniyasi mutaxassislari ishtirokida joriy yilning 23-25 sentabr kunlari bo‘lib o‘tgan “Davlat xaridlari bo‘yicha elektron o‘quv kursi”  dasturi yuzasidan onlayn seminar o‘z nihoyasiga yetdi. Mazkur seminar Jahon banki, Moliya vazirligining Axborot-hisoblash markazi, Moliya vazirligining Davlat xaridlari departamenti xodimlari, Moliya vazirligi huzuridagi O‘quv markazi professor-o‘qituvchilari hamda “Oks technologies” firmasi mas'ul mutaxassislari ishtirokida “Zoom” dasturi orqali o‘tkazildi.

3 kun davomida xorijiy mutaxassislar tomonidan “O‘zbekistonda davlat xaridlarini rivojlantirishni qo‘llab-quvvatlash” loyihasi doirasida ishlab chiqilgan “Davlat xaridlari bo‘yicha elektron o‘quv kursi” dasturidan foydalanish imkoniyatlari, unga zaruriy o‘zgartirish va yangiliklarni kiritib borish yo‘llari, shuningdek, tinglovchilarni ro‘yxatdan o‘tkazish, dasturni  boshqarish kabi muhim amaliyotlar yuzasidan tegishli ma’lumotlar berildi.

Mazkur dasturdan Moliya vazirligi tizimi xodimlari, davlat buyurtmachilari va davlat xaridlari bilan shug‘ullanuvchi mutaxassislar keng foydalanishi rejalashtirilgan bo‘lib, bu ularning davlat xaridlariga oid bilimlarini oshirish va ko‘nikmalarini rivojlantirishga xizmat qiladi.