O‘zbekiston Respublikasi Iqtisodiyot va moliya vazirligi huzuridagi O‘quv markazida korrupsiyaga qarshi boshqaruv tizimlarini joriy etish va rivojlantirish yo‘nalishida navbatdagi muhim bosqich amalga oshirildi. O‘quv markazi boshqaruv xodimlari hamda professor-o‘qituvchilari ISO 37001:2025 xalqaro standarti talablari asosida malaka oshirib, tegishli xalqaro sertifikatga ega bo‘ldi. Mazkur natija mamlakatimizda korrupsiyaga qarshi kurashish, davlat boshqaruvida shaffoflik va hisobdorlikni ta’minlash, shuningdek, zamonaviy komplaens tizimlarini joriy etish borasida olib borilayotgan izchil islohotlarning amaliy ifodasi hisoblanadi.
Sertifikatlash jarayonida xodimlar xalqaro talablar asosida tashkil etilgan o‘quv dasturlarida ishtirok etib, korrupsiyaviy xavf-xatarlarni aniqlash va kompleks baholash, ichki nazorat mexanizmlarini samarali yo‘lga qo‘yish hamda komplaens tizimlarini amaliyotga joriy etish bo‘yicha zarur bilim va ko‘nikmalarni egalladi.
Yakuniy attestatsiya natijalariga ko‘ra, ishtirokchilarning bilim va malakasi ISO 37001:2025 xalqaro standarti talablariga to‘liq mos ekani tasdiqlandi hamda ularga belgilangan tartibda xalqaro sertifikatlar topshirildi.
Mazkur sertifikat xodimlarning:
- korrupsiyaviy risklarni samarali boshqarish,
- faoliyatda shaffoflik va hisobdorlikni ta’minlash,
- ilg‘or komplaens tizimlarini joriy etish
bo‘yicha professional tayyorgarligi yuqori darajada shakllanganligini tasdiqlaydi.
Erishilgan natijalar O‘quv markazida korrupsiyaga qarshi boshqaruv tizimini yanada takomillashtirish, institutsional salohiyatni mustahkamlash hamda ilg‘or xalqaro tajribalarni keng joriy etish borasidagi ishlar izchil davom ettirilayotganidan dalolat beradi.
Kelgusida mazkur yo‘nalishda malaka oshirish dasturlarini kengaytirish, xorijiy tajribalarni tizimli ravishda tatbiq etish hamda yuqori malakali kadrlar tayyorlash sifatini yanada oshirishga qaratilgan chora-tadbirlar davom ettiriladi.
