Joriy yilning 29-yanvar kuni Oʻzbekiston kasaba uyushmalari Federatsiyasi malaka oshirish institutida Tarmoq kasaba uyushmalari Respublika kengashlari, shuningdek, Qoraqalpogʻiston Respublikasi, viloyatlar va Toshkent shahar kengashlari, “Olmaliq kon-metallurgiya kombinati” AJ hamda “Navoiy kon-metallurgiya kombinati” xodimlari kasaba uyushmasi Kengashlari mehnat texnik inspektorlari uchun seminar-trening oʻtkazildi.
Seminar-trening “Budjet parametrlarining taqsimoti, mehnatni muhofaza qilish chora-tadbirlariga mablagʻ ajratish masalasi” mavzusida bo‘lib, uning asosiy maqsadi budjet parametrlarini puxta rejalashtirish va ularni mehnatni muhofaza qilish chora-tadbirlariga maqsadli yo‘naltirish orqali moliyaviy intizomni mustahkamlash, mehnat texnik inspektorlarining amaliy faoliyatida samaradorlikni oshirish hamda ishlab chiqarish jarayonlarida xavfsizlikni ta’minlashga qaratilgan.
Tashkil etilgan bu seminarda Iqtisodiyot va moliya vazirligining Ijtimoiy himoya tashkilotlarini moliyalashtirish va transformatsiya jarayonlarini muvofiqlashtirish boʻlimi bosh mutaxassisi Muxtorjonov Akmaljon, shuningdek, Iqtisodiyot va moliya vazirligi huzuridagi Oʻquv markazi professor-oʻqituvchilari Ilxomov Baxodir va Ibodullayev Shixnazar mavzuga doir maʼruzalar bilan ishtirok etdi. Tadbir davomida tinglovchilarga mehnatni muhofaza qilish chora-tadbirlarini moliyalashtirishning amaldagi tartiblari, budjet mablagʻlarini rejalashtirish jarayonidagi ustuvor yoʻnalishlar hamda ajratilayotgan mablagʻlarning ishlab chiqarish xavfsizligini taʼminlash singari masalalar to‘g‘risida tushuntirishlar berildi.
Bundan tashqari, tinglovchilar bilan o‘zaro fikr almashildi, ular tomonidan berilgan savollarga soha mutaxassislari javob berdilar.
