O‘zbekiston Respublikasi Prezidentining 2020-yil 24-fevraldagi “Moliyaviy hisobotning xalqaro standartlariga o‘tishning qo‘shimcha chora-tadbirlari to‘g‘risida”gi PQ-4611-sonli qaroriga muvofiq O‘zbekiston Respublikasida aksiyadorlik jamiyatlari, tijorat banklari, sug‘urta tashkilotlari va yirik soliq to‘lovchilar toifasiga kiritilgan yuridik shaxslar 2021-yil 1-yanvardan boshlab, Moliyaviy hisobotning xalqaro standartlari (MHXS) asosida buxgalteriya hisobi yuritilishini tashkil etadi va 2021-yil yakunlaridan boshlab moliyaviy hisobotni MHXS asosida tayyorlaydi.
Mazkur topshiriq ijrosini ta'minlash maqsadida Moliya vazirligi tashabbusi bilan Qozog‘iston Respublikasi Milliy banki rahbariyati hamda O‘zbekiston Respublikasi Moliya vazirligi hamda Markaziy bank xodimlari ishtirokida O‘zbekiston Respbulikasi moliya sektorida MHXSni joriy qilish va qo‘llash masalalariga doir 2021-yil 23-aprelda videokonferensiya muloqot orqali uchrashuv tashkil etildi.
Videokonferensiya muloqotda MHXSni bank tizimida dastlabki qo‘llashda Qozog‘iston tajribasi va ular tomonidan berilgan taklif va tavsiyalari, jumladan MHXS joriy qilishda banklar birlamchi tartibda amalga oshirishi lozim bo‘lgan ishlar, MHXSni qo‘llashda vakolatli organning vazifalariga doir foydali ma'lumotlar olindi. Shuningdek, MHXSni qo‘llashda avvalo uning sifati, normativ huquqiy hujjatlarning muvofiqligi, soliq qonunchiligiga ta'siri e'tiborda bo‘lishi ta'kidlandi.
Videokonferensiya muloqot ishtirokchilari bo‘lib o‘tgan muloqot yakunlari bo‘yicha tegishli masalalar yuzasidan savollarni taqdim etish va hamkorlik masalalarida Qozog‘iston Respublikasi Milliy banki ma'sullarining Respublikamizga tashrifi yuzasidan kelishib olishdi.
Moliya vazirligi
Axborot xizmati
