Joriy yilning 10–12-dekabr kunlari Iqtisodiyot va moliya vazirligi huzuridagi
Oʻquv markazida nogironligi boʻlgan shaxslar tomonidan amalga oshirilayotgan tadbirkorlik faoliyatini qoʻllab-quvvatlash, ularning biznesini davlat xaridlari orqali rivojlantirish hamda davlat xaridlarida ishtirokini kengaytirish maqsadida “Davlat xaridlarida yetkazib beruvchilar uchun maxsus kurs” nomli oʻquv kursi tashkil etildi.
Mazkur oʻquv kursi Oʻzbekiston nogironlar assotsiatsiyasi bilan hamkorlikda BMTning Iqtisodiy va ijtimoiy masalalar boʻyicha departamenti (UNDESA) hamda BMTning Taraqqiyot Dasturi (UNDP) koʻmagida tashkil etilib, unda 30 nafar nogironligi boʻlgan tadbirkorlik subyektlari ishtirok etdi.
Oʻquv kursi doirasida ishtirokchilarga Oʻzbekiston Respublikasi Prezidentining 2024-yil 10-iyulda qabul qilingan PQ–249-son “Davlat xaridlari tizimini takomillashtirish va unda kichik tadbirkorlik subyektlari ishtirokini ragʻbatlantirish chora-tadbirlari toʻgʻrisida”gi qarorining mazmun-mohiyati, kichik tadbirkorlik subyektlarining davlat xaridlarida ishtirok etish tartib-taomillari, elektron doʻkon orqali xaridlarni amalga oshirish jarayonlari hamda teng shartlar mavjud boʻlgan hollarda nogironligi boʻlgan shaxslar, xotin-qizlar va yoshlarning bandligini taʼminlagan tadbirkorlik subyektlariga ustuvorlik berilishi toʻgʻrisida maʼlumotlar taqdim etildi.
Shuningdek, davlat xaridlari elektron tizimi operatorlari tomonidan davlat buyurtmachilari va xarid qilish tartib-taomillari ijrochilari oʻrtasida shartnomalarni bajarish jarayonida yuzaga kelishi kutilgan sudgacha boʻlgan nizolarni hal etishda koʻmaklashish amaliyoti yoʻlga qoʻyilgani haqida ham tushuntirishlar berildi.
Oʻquv kursi davomida ishtirokchilarga davlat xaridlari sohasida bilim va malakasini muntazam ravishda oshirib borish uchun yaratilgan imkoniyatlar haqida maʼlumot yetkazildi. Xususan, Iqtisodiyot va moliya vazirligi huzuridagi Oʻquv markazi tomonidan ishlab chiqilgan masofaviy taʼlim platformasida (masofa.tcmf.uz) davlat xaridlari boʻyicha qator oʻquv kurslari mavjudligi, mazkur platformada taʼlim olish mutlaqo bepul ekani hamda undan mutaxassislar
24/7 rejimida foydalanishlari mumkinligi taʼkidlandi.
Kurs yakunida ishtirokchilar davlat xaridlari sohasiga oid masalalar yuzasidan oʻzlarining qiziqtirgan savollariga sohaning malakali mutaxassislaridan asoslantirilgan javoblar olishdi, amaliy tajribalar bilan oʻrtoqlashib, ochiq muloqot qilish imkoniyatiga ega boʻlishdi.
Ahamiyatlisi shundaki, tashkil etilgan mazkur oʻquv kursi nogironligi boʻlgan tadbirkorlarni iqtisodiy faollikka keng jalb etish, ularning raqobatbardoshligini oshirish hamda jamiyatda ijtimoiy inklyuziyani taʼminlashga xizmat qiladi.
