2022 yil 2-mart kuni Oʻzbekiston Respublikasi Moliya vazirligining Soliq-bojxona siyosati va daromadlarni prognozlashtirish departamenti hamda Moliya vazirligi huzuridagi Oʻquv markazi hamkorligida “Davlat budjeti daromadlarini prognozlashtirishning dolzarb masalalari” mavzusida seminar oʻtkazildi. Seminarda Moliya vazirligi huzuridagi Oʻquv markazi xodimlari, Tuman (shahar) moliya boʻlimlarining Obodonlashtirish, kommunal va yoʻl xoʻjaligini rivojlantirish tadbirlarini moliyaviy taʼminlash shoʻbasi bosh iqtisodchilari hamda Tuman (shahar) moliya boʻlimlarining Budjet daromadlari prognozini tuzish va bazasini mustahkamlash boʻlimi boshliqlari ishtirok etdilar.
Mazkur seminar Oʻzbekiston Respublikasi Moliya vazirligi huzuridagi Oʻquv markazining faoliyatini takomillashtirish boʻyicha 2021–2023 yillarga moʻljallangan strategiyasi ijrosini taʼminlash yuzasidan tashkil etildi.
Seminarni tashkil etishdan koʻzlangan asosiy maqsad – Davlat budjeti daromadlarini prognozlashtirishda hamda soliqlarning yigʻiluvchanligini taʼminlashda yuzaga kelayotgan holatlarni kengroq yoritish, daromadlarni prognozlashtirishda hududlarning soliqlar boʻyicha salohiyatlarini tahlil qilish, hududlar daromadlarini rejalashtirish borasida fikrlar almashishdan iborat.
Seminarda Moliya vazirligining Soliq-bojxona siyosati va daromadlarni prognozlashtirish departamenti boʻlim boshligʻi Sharapov Mirodil Abdulboqiyevich maʼruza bilan ishtirok etib, quyidagi yoʻnalishdagi masalalar boʻyicha batafsil maʼlumot berdi:
- 2018 - 2022-yillar uchun davlat budjeti daromadlari tahlili va ijrosi;
- 2022-yil uchun Oʻzbekiston Respublikasi Davlat budjeti daromadlari prognozi;
- hududlarning soliqlar boʻyicha salohiyatlari tahlili.
Seminar davomida vazirlik tizimi xodimlari tomonidan berilgan savollarga asosli javoblar berildi, daromadlarni prognozlashtirish va tahlil qilishga oid vazifalar hamda maqsadlar boʻyicha eʼtibor qaratish lozim boʻlgan jihatlarga, moliya organlari xodimlarining vazifalariga doir masalalarga alohida toʻxtalib oʻtildi.
