O‘zbekiston Respublikasi Prezidentining 2019-yil 8-oktabrdagi PF–5847-son Farmoni bilan tasdiqlangan “O‘zbekiston Respublikasi oliy ta’lim tizimini 2030-yilgacha rivojlantirish konsepsiyasi”da xalqaro tajribadan kelib chiqib, oliy taʼlimning ilgʻor standartlarini joriy etish, jumladan, oʻquv dasturlarida nazariy bilim olishga yoʻnaltirilgan taʼlimdan amaliy koʻnikmalarni shakllantirishga yoʻnaltirilgan taʼlim tizimiga bosqichma-bosqich oʻtish ustuvor vazifalardan biri sifatida belgilangan.
Mazkur vazifalar ijrosini ta’minlash maqsadida joriy yilning 22-dekabr kuni O‘zbekiston Respublikasi Iqtisodiyot va moliya vazirligi huzuridagi Moliya organlari hamda budjet tashkilotlarining moliya-hisob bo‘linmalari xodimlarini tayyorlash va qayta tayyorlash O‘quv markazi, Alfraganus hamda Fan va texnologiyalar universitetlari hamkorligida universitetlarning Iqtisodiyot fakultetlari professor-o‘qituvchilari va talabalari uchun navbatdagi seminar-trening tashkil etildi.
Tashkil etilgan seminarda “IT Park Uzbekistan” startap ekotizimini rivojlantirish bo‘yicha maslahatchisi Rahimjonov Usmon Aminjanovich kirish so‘zi bilan ishtirok etib, “Startap va uni amalga oshirish asoslari” mavzusida ma’ruza qildi. Unda startap tushunchasi, innovatsion g‘oyalarni shakllantirish va amaliy loyihaga aylantirish bosqichlari, shuningdek, startap faoliyatini rivojlantirishda mavjud imkoniyatlar, qo‘llab-quvvatlash mexanizmlari to‘g‘risida batafsil ma’lumotlar berildi.
Seminar-trening davomida O‘quv markazining professor-o‘qituvchilari tomonidan talabalar uchun “Davlat moliyasini boshqarish”, “Yashil iqtisodiyot” hamda “Gender iqtisodiyoti” yo‘nalishlari bo‘yicha muhim nazariy tushunchalar berildi. Shuningdek, talabalarning olgan bilimlarini yanada mustahkamlash maqsadida “O‘zbekiston Respublikasining budjet tizimi”, “Tashabbusli budjetlashtirish” hamda “Mening maktabim” loyihasi doirasida amaliy mashg‘ulotlar tashkil etilib, interaktiv “Blis o‘yin” o‘tkazildi va ishtirok etganlar orasida g‘oliblar aniqlanib, maxsus esdalik sovg‘alari taqdim etildi.
Tadbir yakunida ishtirokchilar seminar-treningning mazmunan boy va amaliy jihatdan foydali bo‘lganligini alohida ta’kidlab, kelgusida ham bunday tadbirlarning o‘tkazilishi oliy ta’lim va amaliyot o‘rtasidagi uzviy bog‘liqlikni kuchaytirishiga, talabalarning kelajakda raqobatbardosh kadrlar sifatida shakllanishiga xizmat qilishini e’tirof etdilar.
