Kichik tadbirkorlik subyektlarining davlat xaridlarida ishtirokini kengaytirish orqali nogironligi bo‘lgan shaxslar, ayollar va yoshlar bandligini oshirish, shuningdek, davlat xaridlari tizimini yanada takomillashtirish va ushbu tizimda jamoatchilik nazoratini kuchaytirish maqsadida O‘zbekiston Respublikasi Prezidentining 2024-yil 10-iyuldagi PQ–249-son qarori qabul qilingan. Ushbu qarorda har yili kamida bir marta nogironligi bo‘lgan shaxslar, xotin-qizlar va yoshlarning bandligini ta’minlagan kichik tadbirkorlik subyektlari uchun davlat xaridlarida ishtirok etish tartib-taomillari yuzasidan qisqa muddatli bepul o‘qitish kurslarini tashkil etish belgilangan.
Shu maqsadda “Davlat xaridlari” bo‘yicha tasdiqlangan dastur va reja-jadvaliga muvofiq Iqtisodiyot va moliya vazirligi huzuridagi O‘quv markazining Davlat budjetining g‘azna ijrosi kafedrasi katta o‘qituvchisi B. Muhammad 2025 yilning 21–23-yanvar kunlari Navoiy viloyatida bo‘lib seminar-trening olib bordi. Seminar-trening 3 kun davomida Navoiy shahri, Zarafshon shahri va Nurota tumanlarida o‘tkazilib O‘zbekiston Respublikasi Prezidentining 2024-yil 10-iyuldagi PQ–249-son qarori bilan elektron do‘kon vositasida davlat xaridlarini amalga oshirishda narx va boshqa sharoitlar teng bo‘lgan hollarda, nogironligi bo‘lgan shaxslar, xotin-qizlar va yoshlarning bandligini ta’minlagan kichik tadbirkorlik subyektlarining takliflari ustunlikka ega bo‘lishi tushuntirildi. O‘zbekiston Respublikasining 27-noyabr 2024-yildagi O‘RQ-1005 Qonuni bilan “Davlat xaridlari to‘g‘risida”gi Qonunga qo‘shimcha va o‘zgartirishlar kiritish bilan davlat xaridlari tizimi takomillashritildi. 
Shuningdek, davlat xaridlari elektron tizimi operatorlari tomonidan davlat xaridlari elektron tizimining mobil ilovasini yaratish amaliyoti yo‘lga qo‘yilishi ham aytib o‘tildi. Nogironligi bo‘lgan shaxslar, xotin-qizlar va yoshlarning bandligini ta’minlagan kichik tadbirkorlik subyektlari xaridlar sohasida bilim va malakasini doimiy oshirib borishi uchun O‘quv markazi tomonidan yaratilgan masofaviy ta’lim portali (masofa.tcmf.uz) bilan ham tanishtirildi.
Respublikamiz hudularida tashkil etilayotgan seminar-trening amaliyotda uchraydigan muammo va savollarga echim topishda va budjet buyurtmachilarining budjet ijrosi jarayonida, tadbirkorlik subyektlari uchun esa davlat xaridlarini amalga oshirishda samarali bo‘lganligi ta’kidlandi.
