Davlat buyurtmachilari hamda tadbirkorlik subyektlarining davlat xaridlari sohasidagi bilim va ko‘nikmalarini mustahkamlash, qonunbuzilishlarning oldini olish va zamonaviy yondashuvlarni amaliyotga joriy etish maqsadida 2026-yil
20-yanvar kuni O‘zbekiston Respublikasi Iqtisodiyot va moliya vazirligi tomonidan “Davlat buyurtmachilari va tadbirkorlik subyektlari uchun davlat xaridlarida ishtirok etish tartib-taomillari hamda “Yashil xaridlar”ni amalga oshirish bo‘yicha qisqa muddatli o‘quv kurslarini tashkil etish” yuzasidan reja-jadval tasdiqlandi.
Mazkur reja-jadval asosida Iqtisodiyot va moliya vazirligi huzuridagi O‘quv markazi tomonidan joriy yilning 27–30-yanvar kunlari Namangan viloyatida, 3–6-fevral kunlari Qashqadaryo viloyatida qisqa muddatli o‘quv kurslari tashkil etildi. Ushbu o‘quv kurslari tasdiqlangan reja-jadval asosida yil davomida respublika bo‘ylab bosqichma-bosqich o‘tkazilishi rejalashtirilgan.
O‘quv mashg‘ulotlari doirasida davlat buyurtmachilari va tadbirkorlik subyektlari uchun davlat xaridlarida ishtirok etishning amaliy tartib-taomillari, tender va elektron savdo mexanizmlari, shuningdek, amaldagi qonunchilikda qabul qilingan so‘nggi yangiliklar batafsil yoritib berilmoqda.
Kurslarning ustuvor yo‘nalishlari “Yashil xaridlar” mavzusiga bag‘ishlangan bo‘lib, ushbu yo‘nalishda ekologik barqaror va energiya tejamkor mahsulotlar hamda xizmatlarni davlat xaridlariga jalb etish, “yashil iqtisodiyot” tamoyillarini xarid jarayonlariga tatbiq etish masalalariga alohida e’tibor qaratilmoqda.
Mashg‘ulotlar tajribali professor-o‘qituvchilar, hududiy trenerlar va soha mutaxassislari ishtirokida interaktiv formatda, amaliy keyslar va ochiq muhokamalar asosida tashkil etilmoqda. Bu esa ishtirokchilarga nazariy bilimlarni amaliy tajriba bilan uyg‘unlashtirish, hayotiy misollar orqali muammolarga yechim topish imkonini yaratadi.
Mazkur o‘quv kurslari davlat buyurtmachilarining budjet ijrosi jarayonida uchraydigan muammolarni bartaraf etishga, tadbirkorlik subyektlari uchun esa davlat xaridlarida samarali ishtirok etish ko‘nikmalarini shakllantirishga xizmat qilmoqda.
Umuman olganda, hududlarda o‘tkazilayotgan ushbu o‘quv kurslari davlat xaridlari tizimida shaffoflik va raqobatni kuchaytirish, tadbirkorlarning ishtirokini kengaytirish hamda “yashil xaridlar” amaliyotini tizimli ravishda joriy etishda muhim ahamiyat kasb etadi.
