Joriy yilning 27-aprel kuni Yevroosiyodagi siyosiy masalalar bo‘yicha guruh a'zolari ishtirokidagi ““Yashil” va “raqamli” muhitga o‘tish uchun smart aloqa” mavzusidagi yig‘ilish bo‘lib o‘tdi.
Mazkur yig‘ilishda guruh a'zoligi uchun taklif etilgan Moliya vazirining o‘rinbosari - Odilbek Isakov ishtirok etdi.
Hududiy muzokaralarni o‘tkazib borayotgan ushbu strategik platforma, Yevroosiyo mamlakatlarining barqaror rivojlanish uchun hamkorligini o‘rnatish, ijtimoiy va geosiyosiy aloqalarni mustahkamlashga ko‘maklashish va to‘rtinchi sanoat inqilobini o‘zlashtirish sohalaridagi istiqbollarini yaratish, malaka oshirish hamda yangi g‘oya va yo‘nalishlarni ishlab chiqish imkoniyatini beradi.
Xususan, guruh a'zolarining navbatdagi yig‘ilishi davomida dunyodagi eng dolzarb mavzulardan biri – To‘rtinchi sanoat inqilobi davrida “yashil va raqamli” iqtisodiyotga o‘tishni jadallashtirish, ayniqsa “raqamli” platformalar va xizmatlarni yaratish orqali infratuzilmani boshqarish va energiya sarflanishining samaradorligini oshirish imkoniyatlari to‘g‘risida muzokaralar olib bordilar.
Shu o‘rinda ta'kidlash joizki, hozirgi kunda mamlakatimizda “yashil” va “raqamli” iqtisodiyotga o‘tish borasida birmuncha tashabbuslar amalga oshirilmoqda.
Jumladan, yig‘ilishda ishtirokchilar, O‘zbekiston Respublikasi Prezidentining 2019-yil 4-oktabrdagi “2019-2030-yillar davrida O‘zbekiston Respublikasining «yashil» iqtisodiyotga o‘tish strategiyasini tasdiqlash to‘g‘risida”gi PQ-4477-son qarorida belgilangan vazifalarning amalga oshirilayotganligi, Moliya vazirligi tomonidan 2020-yil 19-noyabrda chiqarilgan ilk milliy valyutadagi suveren xalqaro obligasiyalarining JP Morgan Development Finance Institution tuzilmasi tomonidan taraqqiyotga bo‘lgan ta'siri “yuqori darajada” baholanishi hamda mazkur obligasiyalar tranzaksiyalaridan kelib tushgan mablag‘larning BMTning Barqaror rivojlanish maqsadlariga erishishga qaratilgan rivojlanish loyihalariga sarflanayotganligi, so‘nggi yillar davomida Elektron hukumat doirasidagi loyihalarining joriy qilinishi va davlat sektorida “raqamli” islohotlarning muntazam ravishda olib borilayotganligi bilan tanishtirildi.
Hozirda jahon hukumatlari, ilmiy jamoatlari va xususiy sektor vakillaridan iborat Yevroosiyodagi siyosiy masalalar bo‘yicha guruh guruhning taklif va tashabbuslari, Davos-Klostersdagi (Shveysariya) Jahon iqtisodiy forumining an'anaviy yillik uchrashuvi davomida tashkilot rahbariyatiga taqdim etiladi.
Moliya vazirligi
Axborot xizmati
