Joriy yilning 24-avgust sanasida kapital bozorini rivojlantirish dasturi doirasida IPO/SPO bo‘yicha seminar-treninglarning ikkinchi bosqichi Toshkent shahrida boshlandi.
Mazkur seminar-treninglar Moliya vazirligi tomonidan Yevropa tiklanish va taraqqiyot banki (YETTB) bilan hamkorlikda tashkil etilgan bo‘lib, tajribali xorijiy ekspertlar va soha mutaxassislari ishtirokida 24-avgustdan 9-sentabrga qadar o‘tkaziladi.
Tadbir auditoriyasi aksiyalari fond bozorida IPO/SPO orqali sotilishi rejalashtirilgan davlat korxonalari va banklari vakillari, kapital bozorining professional ishtirokchilari, IPO/SPO jarayoniga jalb qilingan davlat idoralari xodimlarini qamrab oladi. seminar-treninglarning dastlabki kunida 30 ta tashkilotdan 60 nafardan ziyod mutaxassislar ishtirok etmoqda.
Seminar-treninglarning asosiy qismi IPOga tayyorgarlik ko‘rish jarayoni, iqtisodiy asoslari, korporativ boshqaruvning ahamiyati, shuningdek axborotni oshkor etish va moliyaviy hisobotlarni tayyorlash, tranzaksiya tuzilmasi, investorlarni jalb qilish va ular bilan ishlash masalalari muhokamasiga bag‘ishlandi.
Bundan ko‘zlangan asosiy maqsad davlat korxonalari va banklarida IPO/SPOni amalga oshirish bo‘yicha yetarli salohiyatni rivojlantirish, O‘zbekiston fond bozorida davlat korxonalari va banklari aksiyalarini IPO/SPO orqali ommaviy joylashtirishni xalqaro standartlarga muvofiq tashkil etish hamda kapital bozorining professional ishtirokchilari va aksiyadorlik jamiyatlari mutaxassislarining moliyaviy savodxonligini yanada oshirishdan iborat.
