O‘zbekiston Respublikasi moliya vazirligi huzuridagi O‘quv markazida O‘zbekiston Respublikasi Bosh vaziri tomonidan Vazirlar Mahkamasida 2022-yil 29-aprelda o‘tkazilgan 92-son yig‘ilish bayonnomasining 36-bandida berilgan topshiriq asosida davlat xaridlari sohasida tadbirkorlik sub’ektlarining bilim va ko‘nikmalarini oshirish uchun O‘quv markazida joriy yilning 15-sentyabr kuni davlat xaridlari to‘g‘risidagi qonunchilik hujjatlarining mazmun mohiyatini tushuntirishga qaratilgan o‘quv-seminar tashkil etildi.
O‘quv-seminarda O‘zbekiston Respublikasi moliya vazirligi “Davlat xaridlari departamenti” mutaxassisi Durbek Toxirov, O‘zbekiston Respublikasi Tovar xom ashyo birjasi vakili Jamshid Tuychiyev, Toshkent shahar G’aznachilik boshqarmasi rahbarlari va O‘quv markazi “Davlat budjeti g‘azna ijrosi” kafedrasi katta o‘qituvchisi Sanjar Boltayevlar hamda 150 nafar tadbirkorlik sub’ektlari ishtirok etdilar.
Davlat xaridlari mavzusida o‘quv seminarlar o‘tkazilishi o‘zining ijobiy samarasini berayotganligi, shuningdek bu sohada O‘quv markazi tomonidan muntazam ravishda ishlar olib borilayotgaligi, davlat xaridlaridagi yangiliklar, qabul qilingan oxirgi me’yoriy hujjatlar mazmun-mohiyati to‘g‘risida S.Boltayev o‘z ma’ruzasida ta’kidladi. Shu bilan birgalikda ish jarayonidan ajralmagan holda “masofa.tcmf.uz” – platforma orqali masofadan o‘qish imkoniyati ham yaratilganligi to‘g‘risida batafsil to‘xtalib tushuntirish berildi.
Tadbirkorlik sub’ektlarining davlat xaridlarida ishtirok etuvchilar soni oxirgi davrda yanada ko‘payganligi, ya’ni 2020 yilda 4 foizdan 2021 yil yakuni bilan 35 foizga oshganligi ma’ruzada ta’kidlandi.
O‘quv markazida tadbirkorlik sub’ektlarini davlat xaridlarida bilim va ko‘nikmalarini oshirish bo‘yicha o‘quv dasturi ishlab chiqilib, ularni muntazam o‘qitish bo‘yicha ishlar yo‘lga qo‘yilayotganligi o‘quv-seminar ishtirokchilariga bildirildi va bu ular uchun ayni muddao bo‘lganligi, ularning qiziqishlari yanada ortganligi va bu seminarlar orqali soha mutaxassislaridan ish jarayonida duch kelayotgan ko‘plab savollariga javob topishdi va kelgusida bizneslarini rivojiga zamin yaratilganligini bildirishdi.
