Joriy yilning 24-oktabr kuni Oʻzbekiston Respublikasi Iqtisodiyot va moliya vazirligi huzuridagi Moliya organlari hamda budjet tashkilotlarining moliya-hisob boʻlinmalari xodimlarini tayyorlash va qayta tayyorlash Oʻquv markazining tinglovchilari uchun “Muloqot madaniyati: OAV bilan ishlash” mavzusida mahorat darsi oʻtkazildi. Mazkur mahorat darsi markaz tinglovchilarining koʻnikma va malakasini oshirishga qaratilgan bo‘lib, unda Iqtisodiyot va moliya vazirligi huzuridagi budjetdan tashqari Pensiya jamgʻarmasining tuman (shahar) bo‘limlari boshliqlari ishtirok etdi.
Mahorat darsini Iqtisodiyot va moliya vazirining Ma’naviy-ma’rifiy ishlar bo‘yicha maslahatchisi Obiddin Maxmudov hamda vazirlikning yoshlar yetakchisi, Ijro intizomi bo‘limi bosh mutaxassisi Dilshodjon Jumanazarov olib bordi. Mahorat darsining asosiy maqsadi rahbar xodimlar, mutaxassislarning kasbiy mahorati va koʻnikmalarini rivojlantirish, muloqot madaniyati, OAV bilan faol hamkorlik qilishdan iborat boʻlib, unda quyidagi mavzularga alohida to’xtalib o‘tildi:
- ta’sirchan nutqning ahamiyati;
- nutq orqali auditoriyani jalb qilishning maqsadi;
- auditoriya diqqatini jalb qilish, ularni ruhlantirish yoki ishontirish va boshqalar.
Mazkur mahorat darsi qiziqarli va foydali ma’lumotlar, tinglovchilar o‘rtasida amaliy mashg‘ulotlar va savol-javoblar asosida o‘tkazildi.
Bu kabi mahorat darslarining o‘tkazilishi xodimlarning shaxsiy va kasbiy rivojlanishi bilan birga, umumiy ish samaradorligini oshirishga, tashkilotning muvaffaqiyatli faoliyat koʻrsatishiga xizmat qiladi.
